2009年10月14日 星期三

生不逢時?我呸!

原來真正火滾唔係咩豪宅價格怒升唔關普通百姓事,真正火滾係bow tie 話本屆政府生不逢時!生不逢時?你估你自己係周瑜呀?咩叫政府生不逢時?可以咁計架咩?

本 屆 政 府 生 不 逢 時 , 遇 上 金 融 海 嘯 、 人 類 豬 流 感 及 通 脹 問 題...

咁就話生不逢時?咁董建華時代點計?金融風暴、科網股泡沫爆破、SARS 、23 條、禽流感,董伯伯都未話生不逢時!曾蔭權你好意思話因為生不逢時所以做唔到嘢?你有冇咁無賴?

時間回轉到上世紀中點計?Churchill 遇上WWII唔通又話生不逢時?國共內戰國民黨敗走台灣唔通又話自己生不逢時?睇番而家,Obama 響美國最亂之時做總統,又要搞好外交關係,又要搞掂個金融海嘯,唔通佢又話生不逢時呀?白高敦搞唔掂英國財赤連英法隧道都要賣又話生不逢時呀?成個冰島破產唔通個政府又話生不逢時呀?

你做得到特首正正係因為你太生得逢時,你要多謝董伯伯同陳方安生太生不逢時,你先有資格上位!你入到政府打政府工係因為你太生得逢時,當年政府工唔吃香,你身為一個中七仔都考到EOII 再俾你轉到去AO!你上到位係因為近97 大把英國佬番鄉下先有位俾你!你97 年入市成功打大鱷,係因為咁啱索羅斯響俄羅斯出事,先冇辦法同你玩落去!你條友順風順水到咁你話你呢屆政府生不逢時?

你話你係一個打工仔,咁你有咩資格講生不逢時?你身為一個區的最高管理人,你可以話生不逢時咩?2 年前話香港正面對黃金十年,2 年後就話生不逢時?做到嘢就自己領功,做唔到嘢就賴個天?你有冇咁厚面皮?即你本身預期你做特首時期就應該風平浪靜,順風順水,而你只可以響呢個情況下先做到嘢?即任內一遇到困難就會做唔到嘢,因而覺得係關個天事唔關自己廢事?

你知唔知咩叫生不逢時?你有才能有才華但時不予你就生不逢時!你有d 咩「才」?你d grammar 連小學雞都不如!本屆政府有d 咩叻人?叻條條fing 、飲紅酒同ngon ping san luk ling 呀?叻短視斬樹破壞舊區同上網睇咸網呀?叻擦人鞋同lai 鞋底呀?叻將民運領袖送死呀?叻唔幫香港人爭取有民主呀?生不逢時?你成個政府都係太過生得逢時!如果唔係點解完全做唔到嘢都可以做官掌權?話做唔到嘢係因為生不逢時?你唔知有樣嘢又叫時勢/亂世造英雄呀?

真正生不逢時係香港人遇著你呢條厚顏無恥o既木契做特首、遇著成個特區政府都係廢!你呢屆政府生不逢時?我呸!

8 則留言:

匿名 提到...

我地呢班生於七、八十年代,一味讀書但係最後發現社會上原來再已經無咩機會俾我地發展、賺埋賺埋都唔夠買樓俾首期嘅後生仔,就真係生不逢時啦!

嗰d生於50年代,努力大半生但最後因為一鑊金融風暴同失敗嘅政府施政搞到一鋪清袋、下半生要做看更或者食綜援維生嘅babyboomers,就真係生不逢時啦!

嗰d生於97年後,一出世就被迫接受九流母語教學,最後搞到兩文三語半桶水、獨立思考能力欠奉嘅細路哥,就真係生不逢時啦!

煲呔成世人腐腐碌碌,都可以扶搖直上,佢有咩資格話自己生不逢時呀?請恕我粗鄙d講句:仆佢個臭街!!!

Sam

Agnes Tse 提到...

生不逢時? 生有時死有時.

瑪嘉烈 提到...

sam︰佢住響禮賓府住到懵咗!完全不知所謂!

agnes︰佢應該再睇多d 聖經。

Agnes Tse 提到...

有咁既精英做我地既領導人, 真係喊三千聲都唔止.

我同意唔可以下下靠哂政府, 但煲呔攪到不得民心, 應該要棟高床板諗下點解. 唔係做兩屆特首就算數, 留低個炸彈唔拆, 接手人要跟埋手尾...

匿名 提到...

超,條友之前話自己視民調如浮雲,而家又話自己一向唔想立咩功名,如果你真係咁化,咁你做呢份工來做咩?

仲有,條pk越來越串,尋晚睇傳媒論壇,猛串個亞視記者話唔會有時間去台灣,今日就仲喺度串泛民串錯字,寧可浪費時間去串人,都唔好好去寫好份施政報告,佢都唔知好唔好意思.......

Sam

瑪嘉烈 提到...

agnes: 煲呔真係搞到神憎鬼厭,以前幾唔like 亞董都好都唔夠今日bow tie,我直情覺得bow tie 呢條友不能被尊重!

sam: 條友厚顏到話普選問題俾下一任特首搞!A 字膊到佢咁佢真係好PK!

匿名 提到...

根本就無為民請命嘅心,一時唔小心漏咗口,感嘆自己官運不濟,生不逢時!頂你個肺,區域首長,講啲咁野出嚟!下刪一萬字粗口! by garlic

瑪嘉烈 提到...

GARLIC: 你睇何喜華訪問,佢講到好中,條仆街做嘢係為自己,成個政府都知。