留言當新文

其實冇咩特別，橫掂呢排都冇咩嘢想寫，加上係覆大魔王時寫得太長，唯有又係留言當新文，所以呢篇文的target reader 係大魔王，而當中的「你」字，係指大魔王（咁我真係覆梗佢架嘛）︰

其實要求大學畢業生需要附送工作經驗，唔係今時今日先發生的事架喇，都發生咗好幾年囉。而家d ad 更奇怪的是，佢只要f.7 畢業生，但英文唔該excellent。講真，英文excellent 的話，又點會f.7 止步？好明顯係d 僱主想請廉價優質勞工。

我當然考慮過騎牛搵馬，但份cv 會否因此難睇係令我concern 之一囉。你知啦，d hr 好鍾意針對呢d 位架嘛....所以你話做自己想做的工最正路係正確，所以我唔揀sales 唔揀cs，我而家係apply 我想做的工架，但好難囉。我要求唔高，d 工要求都唔高架，問題係太多人爭喇。我成日都唔明，睇佢份job requirement，其實我都fufil 到吖，點解連in 的機會都冇呢？我係完全百思不得其解！呢一個先係最灰的原因，究竟個問題響邊？？？我係真係想搵個高人指點一下我點解，我甚至認真地諗過不如打電話去d 公司度問點解in 都唔in 我？如果連自己衰咩都唔知，咁我點improve？

其實你做邊行呢？我都知份工有冇前途有時d 嘢話唔埋，但我又真係睇唔到香港仲可以有多元發展... 而家大陸下下同你香港爭鬥，大把行業越來越北移，香港淨番d 咩呢？

至於悲唔悲喇喎，好簡單啫，呢排不如意太多壓力太多嘢諗咪悲d 囉。一個人的心態同思想，唔多唔少點都會受環境影響。所以我成日同男伴講，而家搵到工的話，我一定冇咁悲架。

但我衰女，我信命運的確存在，話我衰到2013（前後衰足20 年，有時唔到你唔信，因為真係中），萬般不順意。八字話，好彩我身硬，意志比較強，如果唔係，我已經痴咗線。冇嘢既，我寧願佢啱，最多捱到2013，捱過去就okay 啦。只不過係要諗下，仲有呢4 年，我究竟要做d 咩令自己好過d。

所以我悲觀，其實好正常，因為我呢20 年都冇乜點好過。一個人經常面對唔開心的事，係好難樂觀，所以重點係究竟悲得嚟積極定消極。

我覺得悲觀唔係壞事吖，好似黃子華咁，如果佢唔係一個悲觀的人，佢又點會做得成一場又一場既好笑又有哲理的楝篤笑同埋電視劇？（我好記得佢響《絕代商驕》入面對住有老人痴呆症的夏萍講︰唔記得唔緊要，有時我都唔記得咗做人為咩架）悲唔係問題，最重要係識苦中作樂，somehow 我覺得我ok 架喎（但我的確冇響呢個blog 度表現過我呢種好mean 的sense of humor），可能睇得黃子華太多，又或者咁講，我根本就覺得我同佢思路好接近（係，呢方面我好自大！），我好識得神經刀地笑呢個世界的荒謬，ok 架，我仲覺得自己好型添。我反而怕樂觀的人，因為我覺得過度樂觀的人有時未免過於天真，正如有人認為命運係完全不存在一樣，係缺乏同理心同想像力的表現。不過冇嘢既，樂又好悲又好，最重要係自己覺得ok 就ok~~

你又好老陳都好，我又唔會覺得你哋講d 咩得罪我，大家交流下，又唔係玩人生攻擊，冇咩問題，反而我多謝你哋捧場就真。至於寫blog，都係act as sharing 同發洩，響呢度講下晦氣說話，總好過我聲都唔聲然後又再走去食煙。

btw，今晚睇咗黃子華《譁眾取寵》，其中一句金句係「寫俾自己睇就係日記，寫俾其他人睇就叫傳記，呢d 人就係覺得自己係傳奇。」我笑了。笑點在哪？請自行猜測。